Pasi koleksionoi 5 fitore në 5 takimet e para në stolin e Manchester United, Ole Gunar Solskjaer u bëri futbollistëve të tij një surprizë të këndshme.
Ai vendosi që skuadra të udhëtojë drejt Dubait, ku do të qëndrojë për 4 net dhe do të shfrytëzojë temperaturat e ngrohta atje, për të kryer disa seanca stërvitore.
Vendimi i trajnerit dhe klubit, për t’u spostuar në kryeqytetin e Emirateve të Bashkuara Arabe, u mirëprit nga futbollistët e “Djajve”, të cilët përveç stërvitjes, do të kenë mundësi të shijojnë edhe plazhin e rrezet e diellit arab.
Megjithatë në fotot e shkrepura në aeroport, pak para nisjes për në Dubai, binte në sy mungesa e yllit të skuadrës, Paul Pogba, ndërsa ende nuk dihen arsyet pse francezi nuk ka udhëtuar me skuadrën.
Ka mjaftuar kaq, që mediat angleze të hedhin hipotezat e një largimi të mundshëm të kampionit të botës nga klubi i Manchester Unitedit, zëra këto që kanë lindur që në periudhën kur “djajtë e kuq” drejtoheshin nga Jose Mourinho.
