Ole Gunnar i trembet sulmit të frikshëm të Liverpoolit. Trajneri norvegjez i Manchester United mbështeti mendimet e Jurgen Klopp në lidhje me Mohamed Salah duke e cilësuar egjiptianin një lojtar të klasit botëror, ashtu si edhe Cristiano Ronaldo.
Të dielën luhet derbi i Anglisë dhe sipas Solskjaer nëse United dëshiron të mposhtë Liverpoolin në “Old Trafford” duhet të bëjë një ndeshje perfekte në fazën mbrojtëse.
“Salah është unik dhe rekordi i tij i shënimit të golave është fantastik, por duhet thënë se egjiptiani është zjarr për momentin. Ju i shihni disa nga golat që ai ka shënuar kohët e fundit dhe ne duhet të jemi në maksimumin tonë për të luajtur kundër tij. Ne duhet të bëjmë një punë të mirë, jo vetëm kundër tij. Unë jam një admirues i madh i vijës së parë, Sadio Mane, Roberto Firmino, ndoshta edhe Diogo Jota do të luajë”, deklaroi norvegjezi.