Ole Gunnar Solskjaer beson se Manchester United ka nevojë për dy ose tri blerje të reja për t’u konsideruar favorit për titullin e Premier League-s sezonin e ardhshëm. “Djajtë e kuq” rritën shpresat për një vend në zonën Champions me fitoren 2-0 ndaj rivalëve të Manchester City-t, të dielën pasdite, por ata mbeten tri pikë poshtë vendit të katërt dhe 37 pikë pas Liverpoolit kryesues.
Sidoqoftë, Solskjaer beson se United do të jetë në gjendje të konkurrojë për trofenë e Premier League-s sezonin e ardhshëm, nëse bën lëvizjet e duhura në gjatë merkatos verore.
“E ndiejmë se po përmirësohemi gjatë gjithë kohës. E dimë se na mungojnë një, dy apo tre lojtarë për t’u vlerësuar si pretendentë për titullin. Po mendojmë për ngjitjen e mëtejshme në klasifikim, por Chelsea dhe Leicester janë ende para nesh.”
Manchster United me fitoren në derbi ndaj City-t regjistroi ndeshjen e 10-të radhazi pa humbje në të gjitha kompeticionet (7 fitore dhe 3 barazime).
Pa kritikave të shumta për shkak të dështimit të vazhdueshëm në merkato, në “Old Trafford” kanë nisur të vlerësojnë afrimet nga vera së kaluar, si Harry Maguire, Aaron Wan-Bissaka dhe Daniel James. Edhe blerja e janarit, Bruno Fernandes, ka patur një impakt mjaft pozitiv në formacionin e Solskjaer.
