Tifozëria cilësohet shpesh si “lojtari i 12” i një skuadre, për të përshkruar më së miri rëndësinë e saj gjatë një ndeshjeje futbolli, ndonëse duhet pranuar se jo të gjithë klubet kanë mundësi të ndjejnë përkrahjen “e zjarrtë” të tyre.
E përditshmja spanjolle Marca ka realizuar një sondazh, që ka zgjatur për disa ditë, ndërsa lexuesit kanë votuar për atë që cilësohet si tifozëria më e mirë dhe më e zjarrtë në botë, prej tyre, ndërsa rezultatet kanë qenë befasuese.
Kështu në krye të renditjes, me rreth 121 mijë vota, është tifozëria e klubit brazilian të Palmeirasit, e ndjekur nga klubi maroken i Raja Casablanca-s, me rreth 41 mijë vota, ndërsa podiumi plotësohet nga egjiptianët e Al Ahly me 37 mijë vota.
Vlen të theksohet se në 20 tifozëritë më të mira renditen ato të disa klubeve spanjolle, që lidhet edhe me bazën e lexuesve të medias që ka organizuar sondazhin, ndërsa nga kampionati italian është vetëm tifozëria e Napolit, që zë vendin e 20.