Padiskutim që sot mund të quhet dita e Kosovës, pasi 3 përfaqësueset e saj, kanë marrë rezultate mjaft të mira. Kështu, pas fitores së skuadrës së madhe, por edhe asaj U-19, ishte radha e Shpresave të Prekazit, që të befasonin Kampionët në fuqi të Europës për 21-vjeçarët, Gjermaninë, në një barazim pa gola.
Nën një atmosferë fantastike, në stadiumin olimpik ‘Adem Jashari’ të Mitrovicës, skuadra e drejtuar nga Rafet Prekazi zhvilloi një lojë të shkëlqyer në mbrojtje, duke sprapsur sulmet e vazhdueshme të gjermanëve.
Formë të shkëlqyer tregoi edhe portieri i Prishtinës, Visar Bekaj, që bëri disa ndërhyrje vendimtare, duke I mohuar golin kundërshtarëve, por edhe duke rrëmbyer duartrokitjet e të pranishmëve në stadium.
Në 45-minutëshin e dytë, Gjermania u hodh e tëra në sulm për të gjetur golin e fitores, ndërsa kosovarët arritën të kundërsulmojnë disa herë rrezikshëm dhe t’i shkojnë pranë golit.
Vlen të përmendet se Kosova U-21 kishte në përbërje shumë futbollistë të Vala Superligës kosovare, ndërsa te Kampionët në fuqi të Europës për 21-vjeçarët, luanin shumë futbollistë që aktivizohen titullarë në skuadra të Bundesligës.
Ky barazim e mban Kosovën U-21 përkohësisht në vendin e dytë të renditjes, pozicion që të çon në Play Off. Takimi i ardhshëm ndaj Irlandës do të jetë vendimtar për të përcaktuar pozitat e skuadrës së Prekazit.
