Pas shkëputjes 3 javore Serie A hapi dyert për fazën e dytë dhe kampionati italian vijon rrugëtimin me një duel si Napoli-Lazio, që përbën padyshim edhe takimin më të rëndësishëm të javës së 20. Jo më kot për një ndeshje të tillë është rezervuar ora 20:30, sfidë e veçantë për të dy ekipet, pasi “të kaltërit” e Ancelotti-t konsiderohen si skuadra anti – Juve e kampionatit, ndërsa Lazio në krahun tjetër synon që këtë herë ta mbyllë sezonin brenda zonës Champions. Ekipi i Simone Inzaghi-t si gjithmonë mbetet një kundërshtar tepër i respektuar, por mbi të gjitha edhe shumë i vështirë për t’u mundur. Miqtë kanë humbur vetëm 1 nga 9 sfidat e fundit në kampionat, ndërsa klubi nga Campania është thyer në vetëm 1 nga 12 takimet e fundit në Serinë A, periudhë ku gjithsesi Napoli ka fituar treçerekun e ndeshjeve në dispozicion. Vendasit do të kenë probleme me formacionin, sepse përveç kapitenit Marek Hamsik do të mungojnë për shkak kartonash edhe tre lojtarë shumë të rëndësishëm si Koulibaly, Insigne dhe Allan, ndërkaq pa telashe nuk është as Simone Inzaghi që nuk do të ketë në dispozicion mbrojtësin Adam Marusic. Napoli ka fituar katër përballjet e fundit mes këtyre dy klubeve, madje tre prej tyre me nga tre gola diferencë, ndërsa në takimin e fazës së parë, pesë muaj me herët, skuadra e Ancelotti-t përmbysi disavantazhin për të dalë nga Olimpico me fitoren 2-1. Kjo sfidë do të jetë edhe një derbi shqiptarësh me Strakoshën që e ka të sigurtë vendin mes shtyllave ndërkohë që mbetet për t’u parë çfarë do të bëjë Ancelotti me Hysajn. Në orën 18:00 interes ngjall gjithashtu edhe dueli Cagliari-Empoli, takim tepër i rëndësishëm në pjesën e poshtme të tabelës së renditjes.
