Për të apasionuarit e futbollit Italian pritja që Serie A të rinisë sërish, do të jetë më e gjatë. Nëse kishte nga ata që mendonin se kampionati Italian do të rifillonte në fillim të majit janë gabuar pasi emergjenca nga koronavirusi në Apenine ka marrë të tjera përmasa gjatë kësaj periudhe, shumë herë më të mëdha. Në një intervistë për mediat italiane ministri i sporteve dhe i rinisë, Vincenzo Spadafora ka theksuar se është surreale të mendohet që futbolli italian mund të rinisë në datën 3 maj.
Për këtë arsye seancat stërvitore nuk do të nisin gjatë muajit prill, shtoi Spadafora i cili nënvizoi gjithashtu se futbolli dhe të gjitha sportet e tjera në Itali nuk do të jenë kurrë më si më parë edhe pse një pjesë e njerzëve nuk e kuptojnë ende diçka të tillë. Sipas Spadaforës qeveria italiane do të ndihmojë sportin me një shifër prej 400 milionë eurosh që kriza ekonomike e klubeve të mos jetë vrastare për një pjesë të tyre.