Spanja ndodhet tashmë në qytetin e Alicantes aty ku këtë të Premte do të sfidojë Shqipërinë në ndeshjen e rradhës për grupin G kualifikues të Botërorit, Rusi 2018. Rreth 200 tifozë e pritën përfaqësuesen La Roja përpara hotelit ku do të qëndrojë deri në momentin e sfidës ndaj kuqezinjëve. Vëmendja ishte e gjitha te Gerard Pique i cili me deklaratat e tij pro Katalunjës është kthyer në një cështje te Spanja gjatë këtyre ditëve.
Një pjesë e mirë e fansave e vërshllyen mbrojtësin në momentin që zbriti nga autobuzi për të hyrë në hotel ndërsa disa të tjerë e ofenduan, por kishte edhe nga ata tifozë të cilët e duartrokitën shtatlartin e Barcelonës. Kishte edhe nga ato kore që thoshin “ Pique të duam”, ndërkohë një mbështetje e madhe iu rezervua dy yjeve të Realit të Madridit, Iscos dhe Asensios.
