Shqipëria nuk ia doli dot të bëjë surprizën ndaj Spanjës, teksa iu dorëzua vendasve brenda 27 minutave, por duhet theksuar se kuqezinjtë luajtën me guxim dhe iu afruan disa herë portës së De Geas, madje në dy raste goditën edhe shtyllën.
Kombëtarja e Panuccit e nisi ndeshjen mirë, duke bërë presing të lartë ndaj spanjollëve, të cilët vuajnë të organizohen në 10 minutat e para, por më pas marrin lojën nën kontroll dhe shënojnë plot tre herë për 11 minuta.
Rodrigo zhbllokoi rezultatin në minutën e 16, Isco në të 24-ën dhe Alcantara në të 27-ën, hipotekuan fitoren për Spanjën. Gjithsesi, kuqezinjtë nuk u dorëzuan dhe filluan të shikojnë drejt portës kundërshtare, ndërsa në pjesën e parë goditën traversën me Llullakun dhe humbën një rast të pastër me Memushajn.
Në pjesën e dytë, Panucci hedh në fushë Sadikun dhe Agollin, ndërsa më pas shton edhe Latifin. Pikërisht sulmuesi elbasanas ka një mundësi të mirë, por topi i goditur prej tij përplaset në shtyllën e portës së De Geas, ndërsa ish sulmuesi i Skënderbeut i afrohet golit dy minuta më pas, por portieri spanjoll reagon mjaft mirë.
Përfundon 3-0, por nuk duhet ta bëjmë dramë, sepse po me këtë rezultat spanjollët mposhtën edhe Italinë, me të cilën do të përballemi pas tri ditëve, në “Loro Boriçi”.
