U mbyll në një barazim spektakolar 2-2 kryendeshja e javës së parafundit të IPKO Superligës së Kosovës mes Gjilanit dhe Ballkanit, ndërsa fituesi i vërtetë i këtij takimi ishte skuadra e Dritës, që me këtë rezultat, u shpall zyrtarisht kampione në Kosovë.
Në takimin e zhvilluar në stadiumin e qytetit të Gjilanit, ishin miqtë nga Suhareka që morën menjëherë iniciativën, duke luajtur një futboll sulmues, që po vinte jo pak në vështirësi skuadrën e drejtuar nga Gentian Mezani.
Megjithatë Gjilani ia doli të mbyllë mirë të gjitha hapësirat në mbrojtje dhe në minutën e 43-të gjeti edhe golin e avantazhit, kur pas një sulmi të shpejtë ishte mesfushori 23-vjeçar Kushtrim Shabani, që shënoi dhe u dha avantazhin vendasve.
Në pjesën e dytë Ballkani zhvendosi lojën në gjysmëfushën e vendasve, duke mos pasur asgjë për të humbur dhe pas disa rasteve të humbura, arriti të rikthejë baraspeshën në minutën e 73-të, kur sulmuesi Mirlind Daku devijoi në rrjetë një krosim të ardhur nga krahu i majtë i sulmit.
Ky gol shpërqendroi totalisht futbollistët e Gjilanit, të cilët humbën toruan dhe vetëm dy minuta më vonë, pësuan edhe golin e dytë. Edhe këtë herë ishte një krosim nga krahu, që u shfrytëzua mirë nga Topalli, i cili gjuajti me kokë dhe e dërgoi sferën në trekëndëshin e portës, duke i dhënë avantazhin Ballkanit.
Gentian Mezanin nuk e mbante vendi në pankinë dhe tentoi menjëherë të përforcojë repartin e avancuar, duke hedhur në fushë emra si Nikaç e Shala, ndërsa goli i barazimit erdhi vetëm në minutën e 94-t, kur pas një tentative të dyfishtë, ishte Razak që dërgoi sferën në rrjetë.
Gjilani nuk e uli ritmin dhe në ato pak minuta të mbetura provoi të gjejë edhe golin e fitores, që do ta rikthente në garë për titullin kampion, por vërshëllima e arbitrit la në fuqi rezultatin 2-2, që i dha titullin kampion Dritës dhe njëkohësisht çoi më pranë një vendi në Kupat e Europës skuadrën e drejtuar nga Mezani.
Kjo pasi me barazimin e sotëm Gjilani mbeti në vendin e dytë me 3 pikë më pak se Drita, por me një bilanc negativ në përballjet direkte, ndërsa kampionët e rinj e shndërrojnë në shëtitje transfertën në Therandë në javën e fundit.
Në stadiumin “Fadil Vokrri” u luajt pasditen e sotme edhe derbi i kryeqytetit mes Prishtinës dhe Flamurtarit, ndërsa bardheblutë e drejtuar nga Armend Dallku arritën të triumfojnë me shifrat 3-0, falë tre golave të shënuar vetëm në minutat e fundit të takimit.
Vitia, Meriton Korenica dhe Uka shënuan golat për Prishtinën, që me këtë fitore u ngjit në kuotën e 62 pikëve, që gjithsesi nuk i mjaftojnë për të siguruar Europën nëpërmjet kampionatit, ndaj do të duhet të fitojë Kupën për një vend në Europa League.
Trepça ’89 mor i një fitore me mjaft vlera, 1-2 në transfertën ndaj Feronikelit në Drenas dhe doli jashtë zonës që të çon në Kategorinë e Parë, ndonëse në javën e fundit do të luajë në distancë mbijetesën me skuadrën e Drenicës.
Siguroi mbijetesën matematikisht edhe Llapi, që triumfoi me rezultatin 2-1 ndaj Ferizajt në një ndeshje pa pretendime për këta të fundit, që tani kanë rënë një kategori më poshtë, ndërsa Dukagjini mposhti Vushtrrinë me shifrat 2-1.
