Vllaznia reflekton optimizëm në prag të derbit të Shqipërisë, ndaj Tiranës. Nuk bëhet fjalë për përgatitjet apo ndonjë deklaratë për bardheblutë, por për të ardhmen. Klubi Shkodran ka zyrtarizuar rinovimin e kontratës së kapitenit Gurishta dhe të Krujës, të cilët do të jenë të lidhur me skuadrën ku janë rritur si futbollistë edhe për dy sezone të tjera.
Atyre u përfundonte kontrata pas 3 muajsh, por sponsori Xhaferi nuk ka pritur fundin dhe ka mbyllur që tani marrëveshjet e reja si pjesë e rëndësishme e projektit afatgjatë për rikthimin tek suksesi.
Rinovimi me këta dy lojtarë sigurisht është diçka shumë e mirë, sepse konfirmon faktin që drejtuesit e Vllaznisë janë duke menduar për të ardhmen. Gjatë verës janë firmosur kontrata afatgjata me lojtarë të tillë si Krymi dhe Adili, ndërsa më pas zgjati bashkëpunimin edhe Ardit Hoxhaj.
