Lajm i rëndë për sportin e Kosovës. Ndërroi jetë pas një aksidenti automobilistik në Gjakovë basketbollisti Gazmend Sinani, lojtar i përfaqësues së Kosovës në basketboll. Ngjarja tragjike ndodhi në orët e para të mëngjesit të kësaj të shtune.
Në po të njëjtin aksident lëndime trupore kanë pësuar edhe Granit e Fisnik Rugova, Altin Morina dhe fizioterapeuti i përfaqësueses Kujtim Shala. Në njoftimin e federatës shkruhet:
“Federata e Basketbollit e Kosovës shpreh ngushëllimet e përzemërta familjes Sinani dhe miqve të Gazmendit për këtë humbje të pakompesueshme. Me ndarjen e tij të parakohshme nga jeta, Kosova ka humbur një prej basketbollistëve më të mirë të gjeneratës, kombëtarja ka humbur njërin prej basketbollistëve më të vlefshëm dhe më luftarak. Angazhimi i tij gjatë përgatitjeve për ndeshjet e qershorit ka qenë inspirim dhe motivim për bashkëlojtarët, kurse qasja e tij profesionale dhe shpirti luftarak do të mbeten në kujtim të secilit adhurues të basketbolli”.
Gazmend Sinani ishte 27 vjeç. Pasi kaloi grup-moshat e reja në Prishtinë, karrierën e vazhdoi në Turqi, ku ishte pjesë e akademisë së Fenerbahçes dhe e përfaqësueseve turke të moshave të reja.
