Kur kanë mbetur rreth dy javë nga ceremonia e famshme e dhënies së Topit të Artë, që cilësohet edhe si trofeu më i rëndësishëm për individë të futbollit, organizatorja “France Football” ka prezantuar edhe spotin e eventit nëpërmjet një videoje.
Pikërisht vëzhgimi i detajuar i këtij spoti, ka dhënë edhe indiciet e para në lidhje me futbollistin që do të “rrëmbejë” këtë trofe për vitin 2018, që ndryshe nga herët e tjera, ka një sërë pretendentësh.
Nga videoja shihet qartë se më shumë vëmendje u kushtohet lojtarëve si Modriç, Varane dhe Mbappe, ndërsa Griezmann është pjesë e spotit, por me fanellën e Atleticos së Madridit, çka e bën të vështirë që të jetë ai fituesi.
Gjithsesi, ajo që duket më e sigurt, është fakti se pas 10 vitesh, do të thyhet hegjemonia Messi-Ronaldo, me dy yjet e futbollit që e kanë fituar nga 5 herë secili gjatë kësaj kohe.
