Intervista e trajnerit të Laçit, Sulejman Starova, dhënë për emisionin “Gol pas Goli” në Supersport, pas ndeshjes që kurbinasit humbën 1-3 ndaj Tiranës në shtëpi, duke mbetur edhe jashtë garave europiane.
Çfarë nuk funksionoi sot me Laçin, që për herë të parë nën drejtimin tuaj, pësoi 3 gola?
Pësuam 3 gola, pasi kërkuam të fitojmë lojën me çdo kusht. Në rastin e parë, portieri më i mirë në Shqipëri, Selmani na mbajti në lojë, por nuk e shfrytëzuam as këtë moment, as kur fituam penalltinë tonë, që e humbëm. Kemi bërë disa gabime që nuk i kemi shfaqur në ndeshje të tjera, ndonëse e nxorëm një gol dhe arritëm të rihapim ndeshjen. Megjithatë duhet t’i japim meritat edhe Tiranës, që e menaxhoi mirë lojën.
Keni qenë trajneri i fundit që e kishit shpallur Partizanin kampion. A do t’i bashkoheni festës së të kuqve?
Sot jo pasi jam akoma i dëshpëruar për humbjen e sotme. Do ketë kohë në ditët në vijim, për t’i uruar të gjithë.
Ku mendoni se gabuat sot në garën për Europën?
Në fakt konkurrenca ka qenë shumë e fortë, pasi në javët e fundit u rikthyen edhe skuadra si Flamurtari e Skënderbeu, që kishin kaluar javë të vështira. Gabuam edhe në merkato disi, pasi rreth 6 lojtarë që erdhën në janar, nuk ia dolën të kapin formacionin, duke bërë që disa boshllëqe të mbeteshin.
