Mbi 530 mijë persona që kanë frekuentuar stadiumet, një total prej 716 mijë biletash të shitura dhe një mesatare prej 29.379 tifozë për çdo ndeshje. Copa America ka përmbyllur etapën e parë me një bilanc pozitiv. Kështu e cilësojnë drejtuesit e Komitetit Ekzekutiv të Conmebol-it.
Drejtori sportiv lokal i Copa America, Agberto Guimaraes, është shfaqur tepër entuziast për rezultatet e arritura deri më tani, por mbi të gjitha edhe për progresin që është bërë ndër vite për organizmin e këtij eventi.
Në të njëjtën linjë është edhe Hugo Figueredo, drejtor i Conmebol, i cili është shprehur se në aspektin e organizimit ky edicion ka qenë tepër pozitiv, ndërsa në aspektin e statistikave ka kaluar Copa American e vitit 2015 që u organizua në Kili.
46 gola të shënuar në total deri më tani, 15% më shumë krahasuar me Copa America 2015. Sa i përket shikueshmërisë, kompeticioni po ndiqet në 179 shtete. Sipas drejtuesve, tendenca është që shifrat të rriten, në të gjithë aspektet, jo vetëm për edicionin aktual.
Drejtuesit e Conmebol, gjithashtu kanë nënvizuar faktin se përdorimi i “VAR”-it i ka dhënë më shumë cilësi kompeticionit. “VAR”-i është përdorur në 17 nga 18 sfida, ndërsa në 11 raste kryesori është afruar vetë pranë ekranit për ta riparë episodin e ndonjë faulli.
Duke iu kthyer statistikave në fazën e grupeve, në vendin e parë për qarkullimin e topit qëndron Brazili me 70.5%, më pas Kolumbia me 54.2% dhe Uruguai në vendin e 3-të me 53.9%.
Edicioni i 46-të i Copa America organizohet në Brazil pa plot 30 vitesh dhe luhet në 5 qytete. Belo Horizonte, Porto Alegre, Rio De Janeiro, Salvador dhe San Paolo, numri i skuadrave pjesëmarrëse është 12.
