Raheem Sterling është shndërruar në transferimin e parë të epokës Todd Boehly te Chelsea. Sulmuesi mbylli eksperiencën me Manchester City pas shtatë viteve me Blutë e Londrës që paguan plot 47.5 milionë paund për ta vendosur nën urdhrat e trajnerit Thomas Tuchel.
27-vjeçari ka firmosur një kontratë pesëvjeçare me opsion rinovimin edhe për një tjetër vit teksa në fjalët e para si futbollist i Chelsea, Sterling thekson se është një djalë nga Londra dhe që më në fund do të luajë para miqve dhe familjarëve të tij.
“Kam arritur shumë objektiva në karrierën time, por ende kam të tjera mundësi për të fituar më shumë trofe dhe mezi pres t’ia dal me Chelsean nën drejtimin e trajnerit Thomas Tuchel. Londra është shtëpia ime dhe vendi ku ka nisur gjithçka. Për mua do të jetë fantastike të kem mundësinë të luaj në Stamford Bridge para miqve dhe familjarëve të mi”, u shpreh Sterling.
