Edhe pse tashmë është një titullar i padiskutueshëm dhe këtë sezon Lazios i ka dhuruar disa fitore shumë të rëndësishme me pritjet e tij vendimtare, si ato në Torino dhe Gjenovë, Thomas Strakosha e ndien se mund të përmirësohet edhe më shumë. Në fitoren e tetë rresht kundër Nice, 22-vjeçari shqiptar nuk u vendos asnjëherë në provë, duke ruajtur si rrallëherë të paprekur portën e Lazios dhe objektivi i tij është që të pësojë sa më pak. Në një intervistë dhënë përpara kësaj sfide, Strakosha u shfaq kritik me veten e tij, duke i habitur jo pak gazetarët italianë. “Objektivi im është që të mos pësoj gola, jam lodhur duke e nxjerrë topin nga rrjeta pothuajse në çdo ndeshje. Duke llogaritur faktin se shënojmë shumë në çdo takim, nëse nuk pësoj, atëherë me 99 % i fitojmë ndeshjet”, – thekson portieri shqiptar që kërkon perfeksionin nga vetja. Në 11 ndeshje gjatë këtij sezoni në kampionat, Strakosha është aktivizuar përherë titullar dhe ka pësuar 12 gola, 4 prej të cilëve në ndeshjen kundër Napolit, që është edhe humbja e vetme sezonale për skuadrën “bardhekaltër”. Ndërkohë, në Europa League ai është aktivizuar në të katër ndeshjet dhe ka pësuar vetëm 3 gola.
