Portieri shqiptar i Lazios, Thomas Strakosha ka menduar sot të përshëndesë ish shokun e tij të skuadrësm Stefan De Vrij, i cili u prezantua dje te Interi.
Portieri i bardhekaltërve rishpërndau postimin e De Vrij si lojtar i Interit dhe përshkroi me shumë përzemërsi miqësinë mes tyre. “Ka qenë një nder të luaje me ty vëlla. Paç fat dhe zoti të bekoftë”, shkroi Strakosha, duke përshëndetur ish shokun e tij të skuadrës.
Mbrojtësi 24-vjeçar holandez luajti për 4 sezone te Lazio, para se të vendoste të transferohej te Interi me parametra zero, pas përfundimit të kontratës me bardhekaltrit.
Në sezonin që sapo lamë pas, De Vrij në mbrojtje dhe Strakosha në portë, ishin dy nga pikat kyçe të trajnerit Simone Inzaghi, që udhëhoqën Lazion drejt rezultateve mjaft të mira.