Reali i Madridit dhe Barcelona zhvilluan përballjen e parë, nga dy të tilla të programuara këtë javë, ndërsa në “Santiago Bernabeu” ishte Barcelona që fitoi dhe festoi kualifikimin për në finalen e Kupës së Mbretit.
Pas barazimit 1-1 në sfidën e zhvilluar në “Camp Nou” 3 javë më herët, mbrëmjen e sotme Barcelona fitoi me rezultatin e thellë 0-3, falë dopietës së Luis Suarezit dhe autogolit të mbrojtësit francez Raphael Varane.
Pjesa e parë ishte me ritëm mjaft të lartë dhe ishte pikërisht Reali i Madridit, që kishte iniciativën, duke kërcënuar disa herë kuadratin e Ter Stegen, veçanërisht me talentin brazilian Vinicius.
Në të njëjtën mënyrë startoi edhe pjesa e dytë, por këtë herë katalanët u treguan mjaftueshëm cinikë, për të shfrytëzuar në perfeksion thuajse çdo dalje në kundërsulm dhe arritën të dërgojnë 3 herë topin në rrjetën e portës madrilene.
Vetëm 3 ditë më vonë, të shtunën në orën 20:45, dy skuadrat do të përballen sërish me njëra-tjetrën dhe sërish në “Santiago Bernabeu”, por këtë herë në sfidën e vlefshme për kampionatin spanjoll.
Takimi ka një rëndësi mjaft të veçantë, pasi Reali do të kërkojë të rikthehet në garë për titullin kampion, ndërsa Barcelona “të vrasë” betejën për kreun. Kjo sfidë do të transmetohet ekskluzivisht në ekranin e Supersport.
