Vllaznia mposhti Teutën me rezultatin minimal 1-0 në “Loro Boriçi” të Shkodrës dhe u shkëput në krye të renditjes me 9 pikë më tepër se ndjekësja më e afërt, ndërsa entuziazmin për ecurinë e skuadrës shkodrane, nuk e fshehin as dy drejtuesit më të lartë, kryebashkiakja Voltana Ademi dhe sponsori Alban Xhaferri.
“Ishte një ndeshje shumë emocionuese dhe mendoj se e merituam plotësisht fitoren, pasi patëm shumë raste për të shënuar. Kam pretendimet e mia për rastin e kartonit të kuq, që ndoshta duhet parë edhe njëherë në përsëritje. Megjithatë kemi krijuar një diferencë të konsiderueshme prej 9 pikësh dhe shpresoj që me ndihmën e zotit ta çojmë deri në fund rrugën që kemi nisur”, u shpreh Alban Xhaferri.
“Jam shumë e kënaqur që ia dolëm, pavarësisht vështirësive që patëm. Mendoj se është një arritje tjetër e skuadrës tonë, pasi kemi luajtur më mirë edhe se ndeshjet e tjera. Ia dedikoj këtë sukses trajnerit Brdaric, Matkos, stafit të trajnerëve dhe mbi të gjitha ekipit, që janë një grup i vërtetë”, tha Voltana Ademi, në cilësinë e kryetares së Bashkisë Shkodër, institucion që ka edhe pronësinë e klubit Vllaznia.