Kombëtarja shqiptare e 17-vjeçarëve po përgatitet për kualifikueset e kampionatit europian. Ndeshjet e grupit në të cilin bëjnë pjesë kuqezinjtë e vegjël do të luhen pas pak ditësh në Portugali, me Shqipërinë U-17 që do të sfidojë Portugalinë vendase por edhe Gjeorgjinë e Ukrainën. Edhe pse kundërshtarët që do të kenë përballë kuqezinjtë janë shumë të fortë, dy mesfushorët Eogen Sula dhe Ilir Gjuzi besojnë dhe janë optimistë se skuadra e drejtuar nga Elvin Beqiri do të bëjë një figurë shumë të mirë në këto eliminatore.
Sula: “Përgatitjet në ekip janë mirë dhe jemi gati. Jemi ekip i mirë dhe i fortë e shpresoj t’ia dalim. Atmosfera është ne mirë pasi jemi shumë shokë, ruajmë njëri-tjetrin në stërvitje, ndihmojmë njëri-tjetrin. Janë ndeshje të rëndësishme sepse na ndihmojnë ne individualisht dhe ndihmojmë ekipin Kombëtar”.
Gjuzi: “Skuadra është gati për në Portugali. Po stërvitemi fort dhe po bëjmë çmos t’ia dalim dhe pse jo të kualifikohemi. Nëse në fushë tregojmë se mund t’ia dalim shanset janë të larta. Nuk i druhemi askujt pasi nëse jemi grup, mund të mundim çdo skuadër. Mund të rritemi edhe më shumë dhe të njihemi me shokët e skuadrës pasi kështu mund të ecim më lart”.