Grupi kinez që zotëron 70% të aksioneve të Interit, Suning nuk ka ndërmend të heqë dorë nga zikaltrit. Mediat britanike zbuluan se së fundmi pronari i Suning, Zhang Jindong kishte refuzuar një ofertë të majme për shitjen e aksioneve të klubit me seli në Milano.
Për më tepër, ky grup ka njoftuar indonezianin Eric Thohir se ka interes të blejë edhe 30 % të aksioneve që zotërohen nga ky i fundit, për t’u bërë pronare e vetme e Interit.
Suning ka përfituar shumë me marrjen e Interit, pasi duke përdorur markën zikaltër, në 2017-ën ka përmirësuar të ardhurat në biznes me plot 23 %. Grupi i njohur kinez ka ndërmend të ngrejë sa më lart emrin e klubit, për të bërë që paralelisht të zhvillohet edhe kompania lider në Kinë.
