Dygolëshi i Mentor Zhdrellës dhe finalizimet e Dakut dhe Zeqirit në pjesën dytë i dhanë një fitore me shumë vlera Llapit përballë Vllaznisë së Pozheranit. 4-1 u mbyll kjo sfidë, që u jep mundësi llapjanëve t’i rimarrin vendin e parë Prishtinës, e cila të shtunën kishte mposhtur 3-1 Flamurtarin. Në fakt, ndeshja nisi keq për Llapin, që u ndëshkua që në minutën e 12-të nga Alidemaj, ndërsa reagimi erdhi në pjesën e dytë me Zhdrellën që realizoi dy gola të njëpasnjëshëm, për t’u hapur rrugë edhe finalizimeve të dyshes Daku – Zeqiri.
Drita e Gjilanit bëri detyrën në shtëpinë e saj, teksa iu imponua me rezultatin 2-0 Besës së Pejës. Autorë të golave për vendasit ishin Rexha dhe Shabani në minutat 68 dhe 79.
“Bie” më në fund Liria e Prizrenit, që drejtohet nga Bledi Shkëmbi. Prizrenasit dolën pa pikë nga fusha e Trepca ’89, pasi u ndëshkuan nga Idrizi në minutën e 55-të dhe Hasani në kohën shtesë.
Vëllaznimi nuk mundi të merrte më shumë se një pikë ndaj Drenicës, që mundi të barazonte 2 minuta para përfundimit të kohës së rregullt me Berishën, teksa në fund të pjesës së parë kishte gjetur rrjetën Zeneli.
Vala Superliga (java 13)
Drita – Besa Pejë 2-0
Llapi – Vllaznia Pozheran 4-1
Trepca 89 – Liria 2-0
Vëllaznimi – Drenica 1-1
Prishtina – Flamurtari 3-1
Feronikeli – Gjilani (e hënë, ora 13:00)