Në verë ishte futbollisti më i kërkuar te Milani, por pas një periudhe të errët, spanjolli Suso tani ka përfunduar edhe jashtë formacionit, pasi Pioli ka vendosur të aplikojë rreshtimin 4-4-2, për të favorizuar prezencën e Ibrahimovic.
Në ndeshjen e fundit të Milanit, në transfertën e komplikuar ndaj Cagliarit, spanjolli qëndroi gjatë gjithë 90-minutëshit në stol, ndërsa siç konfirmohet nga mediat italiane, Suso është thirrur sot në zyrat e klubit, për të diskutuar për të ardhmen e tij.
Për lojtarin ka një ofertë nga Roma, me verdhekuqtë që mbrëmjen e djeshme humbën fantazistin Nicolo Zaniolo dhe shohin pikërisht te spanjolli, njeriun ideal për të luajtur në skemën 4-2-3-1 të trajnerit Fonseca.
Aktualisht palët po negociojnë, por Milani duket gati të heqë dorë nga spanjolli edhe për një shifër prej 20-25 milionë eurosh, ndjeshëm më pak se 30 milionë të kërkuara në verë. Vlen të theksohet se pak ditë më parë ishte menaxheri i spanjollit, Mino Raiola ai që deklaroi se për Suson ka interes nga disa skuadra në Angli e Spanjë.