Barcelona u ndal në një barazim 2-2 në derbin katalan ndaj Gironës, në një sfidë që nisi mjaft mirë për skuadrën e Valverdes, por që u komplikua në minutën e 33-të, pas kartonit të kuq të marrë nga mbrojtësi Lenglet.
Ky i fundit ndali pastër me këmbë sulmuesin e Gironës, por ngriti krahun më shumë se duhet dhe goditi kundërshtarin në fytyrë, ndërsa arbitri i takimit, pasi rishikoi pamjet me VAR, vendosi ta nxjerrë nga fusha.
Vendimi i arbitrit të takimit nuk u mirëprit aspak nga skuadra e Barcelonës, me lojtarët dhe trajnerin Valverde që nuk e fshehën pakënaqësinë në përfundim të takimit.
“Lenglet bën një lëvizje natyrale, nuk është agresion. Pati kontakt, por topi ishte në tokë. VAR-i duhet të ketë të njëjtin kriter për të gjithë dhe duhet përdorur në mënyrë korrekte”, theksoi mesfushori i Barcelonës, Sergi Busquets.
“Nuk jam dakord me VAR-in. Mendova se gjyqtari po shikonte nëse sulmuesi goditi mbrojtësin tim. Nuk kishte fare agresion”, deklaroi Valverde pas ndeshjes, duke ia faturuar pikërisht këtij kartoni, hapin fals të djeshëm.
