E gjithë bota e sportit është solidarizuar me Ukrainën e cila së fundmi është duke u përballur me sulmin e Rusisë që kërkon të marrë kontrollin e plotë të këtij vendi. Kampionatet më të rëndësishme në Europë kanë nisur mesazhet pro popullit ukrainas në këtë moment të vështirë, ndërsa kapitenët e skuadrave kanë ngjyrosur verdheblu shiritin që mbajnë në krah, të cilat janë edhe ngjyrat e Ukrainës.
Kjo ka ndodhur edhe në Holandë me të gjithë kapitenët, përveç atij të Ajax. Fjala është për Dusan Tadic, i cili në këtë javë ku “Harkëtarët” luanin ndaj Waalwijk ka mbajtur shiritin e zakonshëm dhe jo atë për Ukrainën.
Një gjest i cili nuk ka kaluar pa u vënë re, ndërsa pas sfidës tekniku i Ajax, Erik Ten-Hag deklaroi se Tadic nuk e ka mbajtur shiritin për Ukrainën pasi e kishte vendosur atë në ndeshjen e mëparshme në Kupë. Gjithsesi, justifikimi nuk duket bindës pasi kapitenët e tjerë nuk kanë menduar në këtë formë si Tadic, i cili ka bërë një zgjedhje ndryshe, ndoshta prej bindjeve të tij në konfliktin mes Rusisë dhe Ukrainës.
