Në Kosovë ishte një ditë zie, futbolli shqiptar vajton humbjen e Fadil Vokrrit, legjendës së futbollit të Kosovës. Në Prishtinë dita nisi me homazhet për njeriun e kthyer tanimë në një mit, personalitetet dhe figurat më të larta të Kosovës dhe Shqipërisë, në politikë, sport, kulturë e art ishin aty për ti bërë nderimet e fundit njeriut që shkëlqeu si futbollist duke mahnitur mbarë ish Jugosllavinë me talentin e tij, ndërsa si President i Federatës së Futbollit të Kosovës i njihen meritat kryesore për anëtarësimin e saj në Fifa e Uefa. Ishte aty dhe një tjetër legjendë e futbollit të ish Jugosllavisë, Zvonimir Boban, tanimë në rolin e zv/Sekretarit të përgjithshëm të Fifa-s. Fjalë prekëse ato të tijat në mikrofonin e Supersport.
“Kemi ardhur për Fadilin, një legjendë e vërtetë e futbollit Jugosllav. Kemi ardhur për ti shprehur ngushëllimet tona popullit të Kosovës për humbjen e një figure të madhe. Nuk kemi luajtur bashkë, por nëse nuk do të ishin rregullat e asaj kohe në Jugosllavi Vokrri mund të kishte luajtur padyshim për Milanin apo Barcelonën. Ishte një emër i madh që sillej thjeshtë dhe kjo na ka bërë që të ishim më pranë tij. Shpresoj të luaj futboll me të në botën tjetër”.
Ngushëllimet e Uefa-s erdhën nëpërmjet sekretarit të saj Zoran Lakovic që vlerësoi lart figurën e Fadil Vokrrit dhe atë që ai i ka dhuruar futbollit. Për Presidentin e FSHF, Armand Duka janë të vështira fjalët për tu gjetur për humbjen e një njeriu të madh dhe miku të mirë.
Janë të panumërt njerëzit që prisnin në radhë për të nderuar Fadil Vokrrin, mes tyre bashkëpunëtorë, njerëz që kanë patur fatin ta njohin e të punojnë me të. Në orën 17:00 të së dielës Fadil Vokrri u përcoll për në banesën e fundit nga mijra qytetarë që me lot në sy i dhanë lamtumirën e fundit ish presidentit të FFK-së në varrezat e Prishtinës.