Starti i kampionatit është në prag dhe si rrallë herë në vitet e fundit Skënderbeu ka humbur statusin e pretendentit kryesor. Ndryshimet e mëdha në skuadër, që erdhën edhe si pasojë e dënimit të UEFA-s, kanë ulur ndjeshëm cilësinë e skuadrës, megjithatë në Korçë janë të bindur se objektivi mbetet i njëjtë, titulli kampion.
Për momentin, pa nisur kampionati, janë rritur ndjeshëm kuotat e skuadrave të tjera, me Flamurtarin që ka ruajtur boshtin e skuadrës së edicionit të fundit, duke afruar elementë cilësorë si Agustin Torassan dhe Idi Bathën, por mbi të gjitha ka në drejtim trajnerin kampion Ilir Daja.
Kukësi synon të përmirësojë renditjen e vitit të shkuar, ku titulli është objektivi i vetëm. Skuadra ka pësuar ndryshime, teksa është rikthyer në stol një emër i njohur, Armando Cungu, që ambientin e njeh mjaft mirë. Kryeqyteti është i bindur të rikthejë titullin, me Partizanin dhe Tiranën që kanë ambiciet e tyre këtë sezon.
E përbashkëta e dy rivalëve historikë është se kanë bërë një merkato pa bujë, por mbi të gjitha kanë evituar deklaratat e bujshme për objektivin madhor. Megjithatë, ndërtimi i skuadrave rrit kuotat e tyre për t’i parë si pretendentë në garën për titull, që kryeqytetit i mungon prej një dekade. Këtë edicion, lufta për trofeun pritet të jetë më e ashpër, duke parë që plot 5 skuadra janë pothuajse në të njëjtin nivel dhe me urinë për të triumfuar.