Juventus nuk shkoi dot përtej barazimit 2-2 ndaj Salernitanës në “Allianz Stadium”, megjithatë fundi i takimit prodhoi polemika pa fund dhe plot tre kartonë të kuq për bardhezinjtë, përkatësisht për Allegrin, Milik dhe Cuadradon.
Bardhezinjtë rikuperuan disavantazhin prej dy golash dhe në minutën e katër shtesë kaluan në avantazh me Milik, që festoi duke hequr bluzën dhe mori kartonin e dytë të verdhë.
Megjithatë më pas ndërhyri VAR-i dhe arbitri rishikoi aksionin, duke anuluar golin e bardhezinjve çka shkaktoi tension te Allegri e Cuadrado, të cilët gjithashtu u ndëshkuan me të kuq.
Në përfundim të sfidës ishte ish-arbitei Luca Marelli ai që “i hodhi benzinë zjarrit”, duke e quajtur të pakuptimtë vendimin për anulimin e golit të Milik, që ishte i rregullt sipas tij.
“Rregullorja është e qartë për pozicionin jashtë loje aktiv, pasi një lojtar duhet të ndikojë në aksion. Në rastin konkret Milik gjuan dhe Bonucci nuk ndikon aspak, as për t’i penguar rrezen mbrojtësit, e as portierit. Pra thjesht është aty dhe e shoh të paarsyeshëm anulimin e këtij goli. Të pakuptueshëm”, u shpreh Marelli.
Vendimi për anulimin e golit do të komentohet gjatë, pasi Juventus humb kështu dy pikë të tjera dhe mbetet larg zonës së kreut.