Chelsea-Tottenham është një nga duelet më të zjarrta të fundjavës në Premier League. Derbi londinez do të zhvillohet ditën e diel dhe do të transmetohet në Supersport 2 (17:30).
Blutë nuk kanë fituar asnjë nga katër ndeshjet e fundit në kampionat, ndërsa skuadra e Antonio Contes numëron 6 fitore dhe 3 barazime me teknikun italian në pankinë. Thomas Tuchel analizoi derbin, ku ndër të tjera tha:
“Është një ndeshje me rëndësi të madhe. E vërtetë që mund të bëjmë llogari, por është e çuditshme të shohësh skuadra që luftojnë në të njëjtën anë të renditjes dhe kanë katër ndeshje më pak…
Kjo mund të krijojë përshtypjen e gabuar sikur jemi më mirë në renditje, por nuk është kështu. Kështu që duhet të sigurohemi që avantazhi të mbetet i tillë, dhe mënyra më e mirë është të fitojmë ndaj rivalëve direkt”.
Antonio Conte deklaroi se Chelsea është skuadër më e fortë se Tottenhami i tij, koment për të cilin trajneri gjerman i kampionëve të Evropës reagoi në këtë mënyrë: “Pyesni Conten pse është shprehur ashtu. Sigurisht që një koment i tillë nuk duhet të na japë ide të gabuara në lidhje me ambiciet dhe objektivat tona.
Ai përgatit ndeshjen e tij për të fituar, pra për të na mposhtur. Fitorja me përmbysje ndaj Leicester u ka dhënë shumë vetëbesim atyre. Nuk është momenti të bëjmë rolin e filozofit, rëndësi ka ta shijojmë ndeshjen dhe t’i bëjmë mirë detyrat tona.
Në fund një koment për Romelu Lukakun. “Ne jemi të gjithë nën vëzhgim, është një gjë e përditshme. Kështu ndodh nëse je një lojtar vendimtar. Nëse gjërat shkojnë mirë, njerëzit flasin për ty. Përndryshe, njerëzit përsëri flasin për ty“, përfundoi trajneri i Chelsea.
[quiz-cat id=”297408”]
