Julian Alvarez ishte protagonist surprizë për Argjentinën në Kupën e Botës me sulmuesin që pritej të mbante vetëm statusin e zëvendësuesit të Lautaro Martinez. Por, ylli i Manchester City shfrytëzoi më së miri mungesën e golave nga ana e lojtarit të Inter dhe i fitoi besimin trajnerit Lionel Scaloni, duke shënuar edhe katër gola në të gjithë turneun.
21-vjeçari, pritet të rikthehet tashmë te Manchester City me besimin në majë për të përfunduar sezonin e parë me skuadrën e drejtuar nga Pep Guardiola. Megjithatë, aventura në Angli mund të përfundojë më shpejt nga sa ishte menduar, të paktën kështu shprehet një nga ish-trajnerët e parë të Alvarez në Argjentinë, Rafael Varas.
“Ajo që arriti djaloshi është e pabesueshme, ai goli kundër Kroacisë ishte i mrekullueshëm. Unë besoj se një lojtar me aftësitë e Alvarez, nga momenti në moment mund të transferohet në Madrid, te Reali”, u shpreh Varas.
Aktualisht, mes gjithë vëshirësive në lidhje me përshtatshmërinë pasi është thjesht në sezonin e tij të parë në Europë pas tansferimit nga River Plate, “Merimanga” siç edhe njihet ndryshe Alvarez, ia ka dalë të shënojë gjashtë gola në 19 paraqitje me “The Citizens”.