Përvojë e hidhur për Andre Wisdom, mbrojtësin e Derby County-t, ekipit të divizionit të dytë në Angli. Lojtari anglez, shok skuadre me Wayne Rooney, u godit me thikë nga disa banditë që donin ta vidhnin ndërsa dilte nga makina e tij në Liverpool.
Ishte vetë klubi e Derby County-t që e dha lajmin, duke sqaruar se Wisdom pësoi “një sulm të paprovokuar dhe aktualisht është në gjendje të qëndrueshme. Ai pësoi lëndime që e detyruan të shtrohej në spital. Tani qëllimi ynë është t’i japim atij dhe familjes së tij mbështetjen maksimale.” Sipas raportimeve në shtypin anglez, ai po vizitonte të afërmit në periferinë e Toxteth.
“Shërohu sa më shpejt, Wis!”, ishte “cicërima” e publikuar nga klubi anglez, në profilin e tij zyrtar. Ish-lojtari i Liverpoolit ishte protagonist në fitoren 2-1 të Derby-t ndaj Reading, të shtunën, e cila e afroi skuadrën edhe më pranë zonës së play-off-it për promovim në Premier League.