Tërmet te kombëtaret e moshave. Federata Shqiptare e Futbollit ka njoftuar se paraditen e të martës do të organizojë një konferencë për shtyp ku do të prezantojë trajnerët e rinj të ekipeve të moshave. Edhe pse mungon ende zyrtarizimi nga sa mësohet, i vetmi i shpëtuar është trajneri i kombëtares së 21-vjeçarëve Alban Bushi i cili do të vazhdojë punën në krye të Shqipërisë U-21. Është shkarkuar nga detyra ish sulmuesi i kombëtares Erjon Bogdani për shkak të rezultateve të dobëta që ka regjistruar me kombëtaren e 19-vjeçareve. Vendin e Bogdanit pritet ta marrë trajneri i përfaqësueses së 19-vjeçareve të femrave Nevil Dede. Ndryshime edhe në kombëtaren U-17 teksa pas largimit të Mustedanagiç, i cili do të mbajë postin e drejtorit të ekipeve kombëtare, vendin e tij e ka zënë shkodrani Elvin Beqiri.Nuk mund të shpëtonte nga ky ristrukturim as trajneri i kombëtares U-15 Eqerem Memushi. Vlonjati është shkarkuar, pozicionin e tij e ka marrë Armand Damo. Të gjithë trajnerët e rinj pritet të prezantohen ditën e nesërme.
