Formula 1

Testet përgatitore, dominon Ricciardo me Red Bull-in

Piloti i skuadrës së Red Bull, Daniel Ricciardo regjistroi kohën më të shpejtë të ditës së parë, përsa i përket testeve përgatitore të Barcelonës, në prag të sezonit të ri të Formula 1, që starton pas 4 javësh në Australi, me Çmimin e Madh të Melburnit. Temperaturat e ulëta dhe reshjet e shiut në fund të sesionit të pasdites, i bënë pak të dobishme provat e dyta, kështu që në fund të ditës, në pistën e Montmelos rezistuan dhe mbetën të pandryshuara pikërisht 4 kohët më të mira të sesionit të paradites.

Kështu piloti australian i ekipit Red Bull regjistroi kohën 1’20″179, duke lënë në vendin e dytë për 0,170″ pilotin e ekipit Mercedes, Valtteri Bottas. Të dy këta pilotë përdorën goma të mesme, gjithsesi Ricciardo ishte piloti që qëndroi më shumë në pistë, teksa testoi njëvendëshen e tij për plot 105 xhiro, pothuajse dyfishin e kohës krahasuar me pilotin finlandez, që provoi makinën e tij për vetëm 58 xhiro gjithsej.

Në Katalunjë drejtuesit e Ferrarit vendosën që ditën hapëse të këtyre testeve të provonte makinën e kuqe Kimi Raikkonen. Kampioni i botës i vitit 2007 provoi Ferrarin për 80 xhiro me goma të buta, duke e mbyllur ditën me afërsisht 3/10-at diferencë, kundrejt vendit të parë. Kompletoi 4-shen e parë Nico Hulkenberg, i cili ndonëse testoi makinën e tij Renault R.S.18 me goma të mesme për 73 xhiro gjithsej i përfundoi provat e ditës së hënë me kohën e 4-t më të shpejtë të paradites 1’20″547, ndërsa në vazhdim piloti gjerman i la radhën shokut të skuadrës Carlos Sainz Jr.

Piloti spanjoll me vetëm 26 xhiro në pistën e Montmelos u pozicionua në vendin e gjashtë, 2″ larg vendit të parë, sidoqoftë me kohën e tij 23-vjeçari madrilen ishte më i shpejti nga të gjithë pilotët që testuan në provat e pasdites. Në mes të dy pilotëve të Renault u klasifikua spanjolli tjetër, 2 herë kampioni i botës Fernando Alonso, që humbi tre orë nga sesioni i paradites për arsye të një dalje nga pista, për shkak të një problemi në gomën e djathtë, në pjesën e prapme.

Në cirkuitin e Katalunjës koha e lejuar ishte 9 e mëngjesit me orën 18 të pasdites, sidoqoftë piloti asturian u mjaftua me vendin e pestë, me goma super të buta me afërsisht 1,2″ diferencë me Ricciardo-n. Kohën e dytë më të shpejtë në sesionin e fundit e regjistroi kampioni në fuqi Lewis Hamilton, që zëvendësoi kolegun e tij te ekipi Mercedes Valtteri Bottas dhe 4 herë kampioni i botës vuajti kushtet e vështira të pistës, duke u pozicionuar në vendin e shtatë, me 2,2″ vonesë në 25 xhiro që provoi në total. Me radhë më pas u renditën respektivisht edhe gjashtë pilotët e tjerë: Brendon Hartley, Lance Stroll, Romain Grosjean, Marcus Ericsson, Nikita Mazepin dhe Sergey Sirotkin.

To Top