Java e 11-të e Kategorisë Superiore nis me një supersfidë. Të shtunën orën 17:00 në Niko Dovana luhet Teuta-Tirana një duel i drejpërdrejtë për kreun. Një pikë i ndan dy skuadrat në renditje me bardheblutë që qëndrojnë përpara. Me një sukses sot si Teuta ashtu edhe Tirana do të merrnin përkohësisht kryesimin e Kategorisë Superiore. Ajo mes durrsakëve dhe kryeqytetasve është edhe një sfidë mes shumë miqësh brenda. Tefik Osmani do të sfidojë ish-skuadrën e tij, ndërkohë që edhe Julian Ahmataj trajneri i ri i bardhebluve ka luajtur për disa vite te Teuta si futbollist ndërsa në 2016-ën ka qenë edhe për pak kohë trajner i Djemëve të Detit. Parashikohet një sfidë shumë e luftuar në Niko Dovana. Mungesa më e rëndësishme e Teutës është ajo e mbrojtësit Todorovski për arsye skualifikimi ndërkohë që Tirana Albi Doka dhe Elton Cale nuk ja kanë dalë të jenë gati për këtë takim për arsye dëmtimi. Në 4 përballjet e sezonit të kaluar Teuta dhe Tirana ndanë pikët duke regjistruar nga një fitore secila dhe 2 barazime ndërkohë që dhe sfida e fazës së parë e zhvilluar në kryeqytet ka përfunduar në barazim pa gola. Në këtë duel nuk ka një skuadër favorite dhe spektakli duket i garantuar.
