Futboll

Thiago nostalgjik: Mos më krahasoni me dyshen Xavi-Iniesta, ja pse u largova nga Barça

Dikur pjesë e Barcelonës, sot tek Bayerni i Mynihut, Thiago Alcántara konsiderohet si një prej futbollistëve më të talentuar që ka nxjerrë akademia e katalanasve. Në një intervistë, mesfushori u ndal pikërisht te largimi i tij nga ekipi blaugranas në vitin 2013 drejt bavarezëve, në kërkim të mundësive më të mëdha për të luajtur:

“Gjithmonë kam dashur të luaj sa më shumë, e kur pashë që me fanellën e Barcelonës nuk ishte e mundur, u largova. Doja të isha i lumtur për të luajtur futboll, për mua kjo është më e rëndësishme edhe së një trofe. Barçës do i jem gjithnjë mirënjohës, por nuk doja të isha thjesht një nga të shumtët”.

Lojtari me origjinë braziliane, dikur krahasohej shpesh me mesfushorët legjendarë Xavi e Iniesta. Pavarsisht se i konsideron lojtarë të mëdhenj, Thiago deklaroi se nuk i kanë pëlqyer kurrë këto krahasime në fillimet e karrierës së tij:

“Nuk i kam patur qejf kurrë këto gjëra, Xavi e Iniesta janë dy lojtarë të pakrahasueshëm. Lojtarët e akademisë gjithmonë e kanë ëndërr të luajnë për ekipin e parë, dhe kur shohin që mundësitë janë të pakta, largohen. Nuk e di nëse në të ardhmen do të kthehem tek Barça, jam i përqëndruar vetëm tek ky sezon”.

Mesfushori i Kombëtares së Spanjës konsiderohet si një pikë kyçe jo vetëm e iberikëve, por gjithashtu edhe e Bayernit të Mynihut.

 

To Top