Ish mbrojtësi i Juventusit dhe kombëtares franceze, Lilian Thuram ka sulmuar ashpër Leonardo Bonuccin, për deklaratat e këtij të fundit në përfundim të ndeshjes ndaj Cagliarit.
Sulmuesi Moise Kean shënoi dhe u ndal para tifozërisë për të festuar, ndërsa u përball me thirrje të shumta raciste, por “benzinë zjarrit” i hodhi pikërisht qendërmbrojtësi i Juventusit, Bonucci.
“Kean e kërkoi vetë”, tha Bonucci, duke mos pranuar mënyrën e festimit nga ana e shokut të tij të skuadrës, por Thuram është shprehur kategorikisht kundër mbrojtësit italian.
“Nuk e kuptoj çfarë ka dashur të thotë Bonucci me atë frazë. Duke thënë që “e kërkoi vetë”, justifikon mendimin e shumë njerëzve, që të zinjtë marrin atë që meritojnë. Është e turpshme të dëgjosh ato deklarata prej tij”, tha Thuram.
Megjithatë disa orë më vonë, edhe vetë Bonucci reagoi nëpërmjet një statusi në rrjetet sociale, ku tha se deklaratat e të martës në mbrëmje ishin të nxituara dhe se dënon çdo lloj shfaqjeje të racizmit.
