Tifozët e Bayernit të Mynihut kanë protestuar ndaj ndikimit që ka pasur në futboll vdekja e Mbretëreshës Elizabeth II. Fanatikët e paepur të gjigantëve bavarezë njihen për reagimet e tyre mbi temat sociale dhe politike që lidhen me sportin dhe vendosën të mbajnë qëndrim gjatë ndeshjes së të martës mbrëma kundër Barcelonës në Champions.
Përpara dhe gjatë gjithë ndeshjes, pas portës u shfaq një banderolë në shenjë mbështetjeje të tifozëve të Bayernit për homologët e tyre anglezë dhe skocezë.
Në pankartë shkruhej: “Shtyrja e ndeshjeve në momentet e fundit dhe pezullimet për shkak të një vdekjeje mbretërore!? Respekt për fansat!”
Kuptohet që motivi i mesazhit ishte ndeshja e shtyrë mes Rangers dhe Napolit, e planifikuar fillimisht të zhvillohej në Ibrox, të martën në mbrëmje, por që zhvendos në kohë të mërkurën.
Autoritetet e justifikuan këtë vendim me mungesën e forcave të sigurisë, pasi vëmendja është përqendruar te organizimi i funeralit të Mbretëreshës.