Gjatë sfidës mes Izraelit dhe Spanjës, e fituar 0-1 nga skuadra e Lopeteguit, ka ndodhur një episod i pazakontë, që i la të befasuar të pranishmit në stadiumin e Jeruzalemit. Sapo gjyqtari kryesor vërshëlleu për përfundimin e takimit, 6 tifozë vendas thyen radhët e sigurisë, duke vërshuar në fushë.
Sikurse raportojnë mediat izraelite, një prej tyre mbante në dorë një thikë dhe u shkëput nga pjesa e tjetër e grupit duke kërcënuar pikërisht mesfushorin e Realit të Madridit, Isco. Për fat të mirë, tifozi u neutralizua bashkë me 5 agresorët e tjerë të fushës nga forcat e policisë, para se të mbërrinin te lojtarët spanjollë.
Zëdhënësi i policisë deklaroi menjëherë pas këtij episodi se për këtë takim u morën masat e zakonshme të sigurisë, cka tregon se nuk ka patur asnjë të dhënë për ndonjë atentat të mundshëm. Për asnjë moment Isco nuk ishte në rrezik real, pasi forcat e sigurisë izraelite ndërhynë menjëherë, por mbeti i paqartë fakti se si ishte bërë e mundur që ajo thikë të kalohej brenda ambienteve të stadiumit.
