Bardheblutë kanë të programuar datën 5 korrik si ditën që do të nisë grumbullimin dhe me datë 15 do të niset jashtë vendit për të zhvilluar fazën përgatitore. Deri më tani i ashtuquajturi projekti i Superiores ende nuk ka nisur të vihet në jetë.
Procesi deri më tani ka patur në qendër të vëmendjes rinovime kontratash, teksa goditjet e para në merkato ende nuk kanë ardhur. Në fakt, një pjesë e mirë e ekipeve të Superiores po tregohen disi të ngadalta në merkato, por te Tirana episodi i hidhur i një sezoni më parë është një leksion i pastër, ndaj kujdesi duhet të jetë maksimal.
Mund të cilësohet si lajmi i mirë që deri më tani janë ruajtur të gjithë emrat me peshë që ka skuadra, por nuk mjafton me kaq. Vetë tekniku Ze Maria e ka deklaruar hapur se për të përballuar vështirësitë e Superiores nevojitet një grup lojtarësh me përvojë. Vend për t’u nxituar nuk ka, por në radhët e bardhebluve ka ardhur momenti, jo vetëm për rinovime, por edhe për afrime.
