Tirana me një logo të veçantë me rastin e 100-vjetorit të klubit. Drejtuesit e 24 herë kampionëve të Shqipërisë, pak kohë më parë kishin çelur një konkurs, duke ftuar të gjithë dashamirësit bardheblu që të jepnin idenë për stemën që do të përdoret në këtë ditëlindje shekullore të klubit me të titulluar në vend. Nëpërmjet një postimi në faqen zyrtare, klubi i Tiranës ka zbuluar se logoja e e përzgjedhur është ajo punuar nga Florian Sallo.
Njoftimi i Tiranës:
“KF Tirana falënderon të gjithë tifozët për punimet e shumta që kanë sjellë për logon e 100-vjetorit të klubit.
Në kuadër të përgatitjeve për këtë vit jubile, KF Tirana ka ngritur një grup pune me figura të njohura, kontribues ndër vite për historinë e klubit dhe qytetit.
Ish-drejtues, gazetarë, fotografë, autorë librash, njohës të historisë se klubit si dhe personalitete të qytetit të Tiranës, janë pjesë e këtij grupi pune që ka përgatitur një kalendar festiv për 100-vjetorin e KF Tiranës.
Mes tri punimeve më të mira, është përzgjedhur logoja e punuar nga Florian Sallo. Kjo do të jetë logoja zyrtare, që do të përdoret në të gjitha ditët festive të këtij viti jubile.”
