Teuta humbet një nga lojtarët më të rëndësishëm. Rustem Hoxha nuk është më pjesë e “djemve të detit”. Mbrojtësi me lojën e tij i dha një ndihmesë të jashtëzakonshme ekipit durrsak duke qenë një shtysë e madhe drejt titullit kampion. Teuta kishte mbrojtjen më të mirë të kampionatit sezonin e shkuar me vetëm 16 gola të pësuar dhe një nga arsyet ishte pikërisht “muri” që Hoxha shpesh herë i vendoste kundërshtarëve.
30-vjeçari kontrata e të cilit përfundonte pas kupave të Europës ka vendosur me mirëkuptim me klubin që ta mbyll pak më herët aventurën e tij të dytë tek skuadra e tij e zemrës, sepse njoftimi zyrtar i fundit të bashkëpunimit erdhi pak përpara sfidës me skuadrën nga Andorra, Inter Club de Escaldes që do të luhet këtë të martë.
Hoxha, i cili ka dalë nga sistemet zinxhir të Teutës, luajti me këtë ekip nga 2009 deri në 2017 me një shkëputje disa mujore tek Luftëtari në 2013-ën, teksa mbajti edhe shiritin e kapiteni përpara se të largohej drejt Kukësit, ndërkohë që u rikthye në shtëpi në 2019-ën.
Një rikthim madhështor, sepse Teuta në dy sezonet që Rustem Hoxha ishte pjesë e saj fitoi gjithçka, Kupë, Superkupë dhe mbi të gjitha titullin kampion që i mungonte nga viti 1994. Mbetet për t’u parë se cila do të jetë e ardhmja e një prej mbrojtësve më të mirë në Shqipëri, megjithatë e sigurt është që ofertat në drejtim të tij nuk mungojnë aspak.