Tony Parker largohet pas 17 vitesh nga San Antonio Spurs. Basketbollisti francez ka vendosur t’i bashkohet Charlotte Hornets, skuadrës me pronar legjendën e basketbollit amerikan, Michael Jordan, për dy sezonet e ardhshme.
“Është e vështirë ta përshkruash me fjalë rëndësinë që ka patur Tony Parker për Spurs-at në dy dekadat e fundit. Që nga ndeshja e parë në vitin 2001, kur ishte vetëm 19 vjeç, ka impresionuar dhe inspiruar me pasionin dhe dedikimin e tij,” – përcolli përmes një komunikate trajneri i San Antonios, Gregg Popovich.
Parker, sot 36 vjeç, u përzgjodh në draftin e vitit 2001 dhe që nga ajo kohë bëri epokë te Spurs-at përkrah emrave të tillë të mëdhenj si Tim Duncan dhe Manu Ginobili. Të tre luajtën bashkë nga 2002-shi deri më 2016-ën dhe formuan “Big Three” për skuadrën teksane.
Duncan u tërhoq në 2016-ën, ndërsa Ginobili, 41 vjeç, ka vendosur të luajë edhe një sezon. Parker është shpallur katër herë kampion i NBA me San Antonion në vitet 2003, 2005, 2007 (u shpall MVP) dhe në 2014-ën. Ai ka marrë pjesë në 6 edicione të “All Star Game”. Gjithashtu ka fituar kampionatin europian me Francën në vitin 2013, ku u përzgjodh më i miri i turneut.
Në 17 sezone me Spurs Parker ka luajtur në 1 198 ndeshje të sezonit të rregullt, me një mesatare 15.8 pikë për takim, 5.7 asiste dhe 2.8 rikuperime.