Java e 8 e Serisë A italiane startoi mbrëmjen e sotme me sfidën e luajtur ndërmjet Torinos dhe Frosinones, që u fitua me rezultatin 3-2 nga djemtë e Valter Mazzarrit.
“Granatat” zhbllokuan sfidën në fillim të takimit me anë të Rincon dhe dyfishuan me Basellin në fillim të pjesës së dytë, por Frosinone reagoi fuqishëm dhe riktheu baraspeshën duke shënuar me Goldanigën në minutën e 58 dhe Ciano në të 64-ën.
Gjithsesi Torino nuk mund të pajtohej me këtë rezultat në shtëpi, dhe për më tepër përballë Frosinones, ndaj rriti presionin dhe arriti të shënojë golin e fitores me Berenguer në minutën e 71-të.
Me këtë 3-pikësh Torino shkon në vendin e 8 me 12 pikë, ndërsa Frosinone vijon të mbetet e parafundit, me vetëm një pikë në 8 ndeshjet e para të kampionatit.
