Është Toronto FC, finalistja e parë e Major League Soccer. Skuadra kanadeze mposhti 1-0 Columbus Crew në gjysmëfinalen e kthimit që ishte njëkohësisht edhe finalja e Konferencës së Lindjes dhe tashmë do të luajë për titullin e MLS, përballë fitueses së çiftit Seattle Sounders-Houston Dynamo, me ndeshjen e parë që ka përfunduar 2-0 në favor të Seattle. Toronto ndërkohë pas barazimit pa gola në ndeshjen e parë iu fal një finalizimi të sulmuesit të Shteteve të Bashkuara të Amerikës, Jozy Altidore për të kaluar Columbus dhe për të fituar për të dytin vit radhazi titullin kampion në Konferencën e Lindjes. Duhet theksuar se në pjesën e parë spanjolli Victor Vazquez kishte humbur një 11-metërsh për kanadezët. Për Giovincon, Altidore e Bradley tre yjet e Torontos tashmë misioni do të jetë të fitojnë titullin kampion në këtë sezon të MLS.
