Mbrojtësi i majtë spanjoll Sergio Reguilon do të transferohet në kampionatin anglez te Tottenham, pasi “Spurs’ kanë arritur marrëveshjen me Realin e Madridit dhe zyrtarizimi është vetëm çështje orësh.
Siç raportojnë mediat britanike, mbrojtësi 23-vjeçar pritet të mbërrijë që sot në Londër dhe pasi të kalojë me sukses vizitat mjekësore, do të firmosë një kontratë që do ta lidhë me Tottenhamin deri në verën e 2025-ës.
Për kartonin e mbrojtësit të talentuar, i cili vitin e fundit ishte në huazim te Sevilla, Tottenham do të paguajë plot 30 milionë euro, ndërsa vlen të theksohet se Reali i Madridit ka ruajtur të drejtën e riblerjes për 45 milionë euro.
Ky ishte edhe kushti i panegociueshëm i madrilenëve, të cilët nuk kanë preferuar kurrsesi të heqin dorë përgjithmonë nga një futbollist shumë i talentuar, mbi të gjitha i rritur në akademinë e klubit.
Ndërkohë në ditët e ardhshme pritet që edhe Gareth Bale të transferohet nga Madridi drejt Tottenhamit, me formulën e huazimit një vjeçar. Lajmin e dha vetë menaxheri i uellsianit, që pranoi se ky i fundit dëshiron rikthimin në Londër, ku edhe shkëlqeu me fanellën e “Spurs”.
