Pas plot 517 ditësh, Tottenhami “prishi agjërimin” në merkato, duke njoftuar blerjen e dy futbollistëve, të riut Jack Clarke dhe mesfushorit të talentuar të Lyonit Tanguy Ndombele.
Ishte pikërisht 31 janari i 2018-ës, kur “Spurs” sollën në Londër Lucas Mourën, i cili ishte edhe futbollisti i fundit i afruar në merkato, sepse më pas drejtuesit investuan vetëm në ndërtimin e stadiumit të ri, duke mos sjellë asnjë lojtar të ri në skuadër.
Emri i parë që u prezantua në faqen e klubit, ishte ai i Clarke, i cili nënshkroi një kontratë 5-vjeçare me Tottenham, por do të rikthehet sërish te Leeds, ku do të kalojë edhe këtë sezon në huazim, për t’u rritur dhe pjekur më shumë.
Megjithatë vetëm pak minuta më vonë, drejtuesit e Tottenhamit rritën ndjeshëm entuziazmin e tifozërisë, duke prezantuar edhe blerjen e mesfushorit Ndombele, një emër që ndiqej nga shumë skuadra në Europë.