Pas zërave që erdhën javën e kaluar, më në fund ka ardhur edhe konfirmimi zyrtar: Francesco Totti ka vendosur të vijojë karrierën po në futboll, por tani i përqendruar në zbulimin e talenteve dhe menaxhimin e lojtarëve.
Ka qenë vetë ish kapiteni dhe legjenda e Romës, që nëpërmjet një postimi në rrjetet sociale njoftoi se ka themeluar dy kompani CT10 dhe IT Scouting, të dyja me qendër në kryeqytetin e Italisë dhe që do të operojnë si konsulente për klubet dhe lojtarët.
Vetë Totti në një intervistë të dhënë më herët për transmetuesin e kampionatit italian “DAZN”, pranoi se i pëlqen të zbulojë talente dhe të asistojë ata drejt rritjes së nivelit sportiv, duke dhënë sinjale mbi të ardhmen e tij.
“Do të më pëlqente të bëja skautin e talenteve. Ka shumë të tillë edhe në Itali, ndonëse nuk më pëlqen të them emra për momentin. Unë jam gjithmonë aktiv dhe më pëlqen të njoh gjithçka. E ardhmja është gjithmonë e bukur, ndaj të presim çfarë më ka rezervuar mua”, deklaroi dikur ish kapiteni i Romës.