Tragjedia që goditi qytetin e Gjenovës me rrëzimin e urës në autostradën A10 që ka shkaktuar me dhjetëra të vdekur, ka prekur edhe dy skuadrat e qytetit që marrin pjesë në Serinë A, Genoa dhe Sampdoria.
Dy shoqëritë u kanë shprehur ngushëllimet familjarëve të viktimave dhe janë gati të kërkojnë shtyrjen e ndeshjeve të tyre në javën e parë të Serisë A. Trajneri Ballardini ka anuluar seancën stërvitore të kuqebluve, pasi disa lojtarë e kanë patur të pamundur të mbërrijnë në Pegli, ku do të zhvillohej seanca e radhës.
Nga kjo tragjedi kanë mbetur të shokuar të gjithë, tifozë dhe lojtarë të të dyja skuadrave, që ishin mësuar të udhëtonin thuasje çdo ditë mbi urën tashmë të rrëzuar.
Bilanci i viktimave në qytetin e gjunjëzuar të Gjenovës, ku edhe moti është përkeqësuar, sa vjen e rëndohet.
Presidenti i CONI-t, Giovanni Malago, ka kërkuar që të mbahet një minutë heshtje deri në fundjavë në të gjitha aktivitetet sportive.