Manchester United mbylli bilancin e sezonit të kaluar me një humbje prej rreth 130 milionë eurosh, teksa natyrisht që një pjesë e mirë e tyre kanë shkuar në xhepat e trajnerit austriak Ralf Rangnick.
Ky i fundit mbërriti në Manchester në 2 dhjetor të vitit të kaluar për të zëvendësuar Ole Gunnar Solskjaer, por qëndroi vetëm 6 muaj në stolin e “djajve të kuq” duke mos sjellë kthesën e shumëpritur në rezultate.
Sipas bilancit të publikuar nga klubi anglez, Ranknick ka marrë rreth 16 milionë euro dëmshpërblim vetëm për ndërprerjen e kontratës me Manchester United, të cilave u shtohen edhe ato që përfitoi si rrogë gjatë 6 muajve në “Old Trafford”.
Në total rreth 20 milionë euro, të cilat “djajtë e kuq” i paguan vetëm për të pasur 6 muaj në pankinë trajnerin austriak, sakrificë kjo që nuk pati asnjë vlerë, pasi Manchester United e mbylli kampionatin vetëm në vendin e 6.